სწორედ ამის დამსახურებაა, რომ დღევანდელი ავტომობილები სავსეა ფუნქციებით, მრავალფეროვანი აღჭურვილობებითა და ფუფუნებით.  რა თქმა უნდა, ამ ბედს ტოიოტაც იზიარებს, თუმცა არა Land Cruiser 70 სერია, რომელიც ამ ტენდენციას არღვევს და უკვე 38-ე წელია პრინციპულად არ კარგავს ინდივიდუალიზმს. 

წლების განმავლობაში LC70 თავისი სტილის ერთგული დარჩა. წლიდან წლამდე ტოვებდა სხვადასხვა კომფორტისა და ფუფუნების ელემენტებს და ინარჩუნებდა იმ ხასიათს, რომლითაც დაიბადა და წარსდგა საზოგადოების წინაშე. 

თავისი ისტორიის განმავლობაში Land Cruiser-ი არასოდეს ყოფილა მხოლოდ ერთი ავტომობილი. მისი სერია საკმაოდ ფართოა, სხვადასხვა დანიშნულების მქონე მანქანებით. ყველა მათგანი მაღალი გამავლობისაა, უგზოობისთვის დაბადებული, თუმცა სხვადასხვა ტიპის მომხმარებლებზე გათვლილი. LC 40-ის გამოშვების შემდეგ ხაზი ორად გაიყო, ერთი სერია გაგრძელდა LC 55-ით, რომელსაც დღევანდელ, ახალი ეპოქის მოდელთან, LC 300-თან მივყავართ, ხოლო მეორე ხაზი -  LC70-ით, რომელიც ღირსეული შთამომავალია პირველი, ორიგინალი Land Cruiser-ის. 

პირველი ხაზის წარმომადგენელი, რომელიც LC 300-ითაა დაგვირგვინებული, დროთაგანმავლობაში გაიზარდა ზომითა და წონით, დაიხვეწა და აღიჭურვა კომფორტის იმ მრავალი ელემენტით, რაც მფლობელსა და მის ოჯახს ესაჭიროება. მეორე სერია კი საპირისპირო გზით წავიდა შეინარჩუნა ის სიმკაცრე, რაც დღემდე გამოარჩევს მას სხვა მსგავსი ავტომობილებისგან. 

LC70-ის განახლება, წლების განმავლობაში, მხოლოდ უსაფრთხოების ნორმებისა და ფუნქციების გაუმჯობესებით შემოიფარგლებოდა. დანარჩენი, მისი აგებულება და მექანიზმი იგივეა, რაც 37 წლის წინ იყო. ამ ყველაფერს ისიც მოწმობს, რომ ამ სერიის ყველა მოდელი 5 სიჩქარიანი მექანიკური ტრანსმიისთ არის წარმოდგენილი. 

მხოლოდ მისი კარის მაგალითზე რომ განვიხილოთ, მეტალის სახელური, კარის მექანიკური ჩამკეტი, მისი მჭახე ხმა გაღებასა და დაკეტვაზე, მაშინვე გვანიშნებს, რომ ეს ავტომობილი სხვა ეპოქიდანაა. კარები ნამდვილად გეტყვით ყველაფერს, რაც უნდა იცოდეთ LC70 სერიის შესახებ. „რბილი შეხება“ ნამდვილად არ არის ის ფრაზა, რომელიც ამ ავტომობილის დანახვასა და შეხებაზე გაგახსენდებათ. 

ფუფუნების ელემენტებად მხოლოდ ელექტრო ჩამრთველები შეგვიძლია დავასახელოთ და ხის ორნამენტები, რომლებიც  უნიკალურია და 70th Anniversary-ს სპეციალური გამოშვებისთვის დაემატა დიზაინში. 

ამ ავტომობილის ყველა დეტალი წარსულში გადაგისვრით და ძველ დროს გაგახსენებთ. ეს არის მანქანა, რომელთან ურთიერთობასაც გასაღებით იწყებთ. მისი კარების გაღება სწორედ გასაღებით ხდება. უფრო მეტიც, მოდელების უმეტესი ნაწილი კვლავ ჰალოგენური ფარებითაა წარმოდგენილი. მხოლოდ 70-ე წლისთავზე დაემატა პატარა ლედ განათებები. 

თუმცა, ამ ყველაფერმა არ უნდა გაფიქრებინოთ, რომ ვიზუალურად მე-20 საუკუნის ავტომობილი ისეთივე მძიმე სამართავია, როგორი სირთულეც იმ პერიოდის მანქანებს ახასიათებდათ. ეს ასე ნამდვილად არ არის. მისი საჭე დაბალანსებულია, არც ძალიან მძიმე და არც მოშვებული და მცურავი. ამავედროს, ავტომობილის კაბინა ისეთ პოზიციაშია და იმდენად მარტივია მთლიანი პერიმეტრის კონტროლი, რომ მისი მართვა და პარკინგი უკანა ხედვის კამერისა და სენსორული პარკირების გარეშეც ძალიან მარტივია. 

ეს არ არის ქალაქის კომპაქტური ავტომობილი, რომელიც სახლიდან სამსახურში გადასაადგილებლად გამოგადგებათ. ეს არის მანქანა, რომლიც შეიძლება მსუბუქ სატვირთოდაც კი განვიხილოთ, ვინაიდან უგზოობისთვის და მძიმე ტვირთის გადასაზიდად იდეალური ვარიანტია. რეალურად, ის ხომ იმისთვისაა შექმნილი, რომ უხეში რელიეფის გზა დაიპყროს და გადალახოს ყველა წინაღობა, რაც სხვა ავტომობილებისთვის მართლაც წინაღობაა, მისთვის კი  - არა. 

ამ ავტომობილის აუდიო სისტემაც, პირდაპირ რომ ვთქვათ, არქაულია. მართალია, აქვს Bluetooth და MP3-ს აჟღერებაც შეგიძლიათ, მაგრამ აქ ვერ იხილავთ Apple CarPlay ან Android Auto-ს. 

შესაძლოა, ვინმემ იფიქროს, თუ რატომ უნდა შეიძინოს ეს მინიმალური ფუნქციების მქონე ავტომობილი, როდესაც შეუძლიათ, რომ იგივე ფასად მეტი კომფორტი მიიღონ, მაგრამ ამ ავტომობილის მთავარი ხიბლიც ეს ინდივიდუალიზმია, რომელიც ამდენი წლის განმავლობაში არ დაუკარგავს. ფეხი აუწყო ჟამთა სვლას, მაგრამ მაინც შეინარჩუნა ის 80-იანი წლების ხასიათი, რომელიც დღემდე ძალიან მოსწონთ მის მომხმარებლებს. ეს ავტომობილი გთავაზობთ დიდ შესაძლებლობებს და გაძლევთ საშუალებას, რომ 21-ე საუკუნეში, იქ, სადაც უკვე ყველა ავტომობილი ერთმანეთს ჰგავს და ნელ-ნელა ელექტრო ავტომობილების ხანა იწყება, გყავდეთ ახალი, გამძლე, მაღალი გამავლობის ძველებური სტილის ავტომობილი, რომელიც ყველასგან გამოგარჩევთ და წარსულის მოგონებებს მუდამ თქვენთან ატარებს.