„ტოიოტა ცენტრი თეგეტა“ (ს/კ: 405006461) ტოიოტას ოფიციალური დილერია საქართველოში. ცენტრი აერთიანებს ადმინისტრაციულ ოფისს, შოურუმსა და სერვისცენტრს და მდებარეობს უნივერსიტეტის ქუჩის №6-ში.
2014 წლის 24 მარტს კომპანიამ „ტოიოტა კავკასიისგან“ ტოიოტას ოფიციალური დილერისა და ავტორიზებული სერვისცენტრის სტატუსი მიიღო. იმავე წლის ივლისში კომპანიამ ტოიოტას ავტომობილების გაყიდვა დაიწყო, სექტემბერში კი განახლებული სერვისცენტრი გაიხსნა, რომელიც გამოირჩევა მასშტაბითა და ტოიოტას ევროპულ სტანდარტებთან შესაბამისობით.
პროექტი სს „თიბისი ბანკისა“ და ევროპის რეკონსტრუქციისა და განვითარების ბანკის (EBRD) მხარდაჭერით განხორციელდა. პროექტის ფარგლებში „თეგეტა მოტორსმა“ 11 მილიონამდე ლარის ინვესტიცია განახორციელა.
კომპანია მონობრენდულია და მისი საქმიანობა სრულად ტოიოტას ავტომობილების გაყიდვასა და მომსახურებაზეა ორიენტირებული. სერვისცენტრი აღჭურვილია უახლესი ავტორიზებული პროგრამული უზრუნველყოფით, თანამშრომლები კი რეგულარულად გადიან პროფესიულ ტრენინგებს. ეს ყველაფერი ხელს უწყობს მომსახურების მაღალი ხარისხის უზრუნველყოფას.
შპს „ტოიოტა ცენტრი თეგეტა“ „თეგეტა მოტორსის“ რიგით მეხუთე შვილობილი კომპანიაა. მომხმარებელს ის სთავაზობს ტოიოტას უახლეს მოდელებს, მხოლოდ ორიგინალ სათადარიგო ნაწილებსა და აქსესუარებს, ასევე სრულ ტექნიკურ მომსახურებას.
